| Rose
word maklik gekweek, maar aangesien hulle tot die blommeadelstand hoort,
floreer hulle op ekstra aandag. Rose moet ten minste weekliks water kry
- elke plant 20 liter sodat die grond deeglik deurweek word. Water moet
elke tweede dag toegedien word in somerhitte-toestande, veral waar daar
in vlak of sanderige grond geplant is. Moderne rose is gekweek met die
doel om langsteelblomme te produseer en om vir die grootste deel van die
jaar te blom - hiervoor het hulle egter gereeld addisionele voeding
nodig.
‘n Volgroeide plant moet ‘n handvol
(angeveer 50g) bemesting soos 5:1:5 of Wonder 8:1:5 (25) elke
maand tot ses weke ontvang. Die beste manier van toediening is om die
bemesting rondom of oor die bos te strooi sodat dit die wortelsone
eweredig binnedring. Die water sal voedseld-deeltjies oplos en na die
wortels vervoer. Moet nie inspit nie.
Die belangrike aktiewe wortels van
roosbosse is vlak en floreer in deeglik belugte grond. Hulle is egter
uiters sensitief vir hitte en dit is dus noodsaaklik dat die wortelsone
met ‘n 10cm dik deklaag bedek word. Die beste deklaag is growwe,
organiese stof soos dennenaalde, houtskaafsels, grondboontjie-doppies,
blare of stukkies houtplank. Deur rose 60cm uit mekaar te plaas eerder
as een meter, maak u dit vir hulle moontlik om tot ‘n groot mate hul
eie skaduwee te voorsien. Om te verseker dat u langsteel-blomme volmaak
is, moet u hulle gereeld met "Rosecare" of ’n nie-toksiese
oplossing van 20ml Oleum plus 10g koeksoda plus ‘n teelepel vol G49 of
vloeibare seep in 10 liter water opgelos, bespuit.
As u hulle so behandel, sal rose groei
en blom. As u dan boonop persoonlik aandag aan hulle skenk deur hulle
vir die vaas te sny of bloot deur hul dooie knoppe af te pluk en
onbenullige sytokkies af te sny, kan u die gehalte daarvan verbeter. U
kan nie verkeerd sny nie mits u die bos nie te kaal sny nie.
Rose moet hul jaarliks verjong. Kwaai
snoeiwerk in die winter help die bos om dit te doen. ‘n Roos kan nie
verkeerd gesnoei word nie. Plante word eenvoudig tot omtrent knie-hoogte
teruggesny en ouer takkies word van binne uit die plant verwyder. Die
aangewese tyd om so te maak is van af middel-Julie tot middel-Augustus
afhangende van hoe kwaai die winter in elke afsonderlike tuin beleef
word. Bespuiting met kalkswawel nadat u gesnoei het sal die spore en
eiers van plae vernietig.
|
